गजल -- माया नलाउ !!

त्यो मुटुमा तस्बिर मेरो, टाँस्न ब्यर्थै नखोज है !!
बुझ्दिन म मायाप्रिती, गाँस्न ब्यर्थै नखोज है !!

मायाको त्यो डोरी उनी,पिरतिको जाल बुनी,
आजादी यो तिमी मेरो, मास्न ब्यर्थै नखोज है !!

बालापन कतै छोड्यौ,जवानीको घुम्टो ओढ्यौ,
त्यस्कै तीर ले यो मुटु, पास्न ब्यर्थै नखोज है !!

साथै जिउने मर्ने रहर, भन्छ्यौ डुलौ प्रेम नगर,
लोभलाग्दो दल्दलमा, भास्न ब्यर्थै नखोज है !!

निश्ठुरी नै सोच बरु, माया अर्कै खोज बरु,
भिजाएर परेली ती, हाँस्न ब्यर्थै नखोज है !!

मेरो प्रश्न !!!!!

आफ्नै स्वार्थ मात्रै हेर्ने बानी रोक्न मिल्दैन कि !!
बिरामी ती आमाको भार मिली बोक्न मिल्दैन कि!!

एमाले र कांग्रेस भन्छन सरकार हामी चलाऊँछौ !!
मशाल बोकी माओवादी भन्छ सरकार ढलाउँछौ !!
चलाऊने र ढलाउने यो खेल रोक्न मिल्दैन कि !!
बिरामी ती आमाको भार मिली बोक्न मिल्दैन कि!!

एक मधेश एक प्रदेश कुर्लदैछ फोरम पनि !!
बिभेदहरु जन्मदैछन जात, धर्म, क्षेत्र बनी !!
नेपालीमै भाँजो हाल्ने काम रोक्न मिल्दैन कि !!
बिरामी ती आमाको भार मिली बोक्न मिल्दैन कि!!

राप्रपाको उही पारा बाँकी भाका दल नि त्यस्तै!!
सत्ताको नै लोभमा परि यताउती धाउन ब्यस्तै !!
सत्ताको यो लुछाचुँडी अझै रोक्न मिल्दैन कि !!
बिरामी ती आमाको भार मिली बोक्न मिल्दैन कि!!

हामी जनता चेतनशिल किन भन्छौ आँफैलाई !!
मौन नै छौ अझै पनि धेरै चोटि घात पाइ!!!
बुझेर नि अबुझ बन्ने नाटक रोक्न मिल्दैन कि !!
बिरामी ती आमाको भार मिली बोक्न मिल्दैन कि!

गजल-- आव्हान !!

बिकासको मुल अब फुट्नु पर्छ भन्छु म त !!
गाउँ शहर लेक बेशी जुट्नु पर्छ भन्छु म त !!

कती तोड्छौ भत्किएको घरलाई अझै तिमी,
बन्द हड्ताल पुग्यो अब छुट्नु पर्छ भन्छु म त !!

चुहिने त्यो घरको छानो टाल्नलाई मिलिजुली,
भाईचाराको गिटी पनि,कुट्नु पर्छ भन्छु म त!!

एकताको उदाहरण बनाउन यै देशलाई ,
अनेकताको बाँध अब,टुट्नु पर्छ भन्छु म त !!

राम्रो गरे साथ दिउँ, गलत गरे खबरदारी,
जागरुक भै अब सबै उठ्नु पर्छ भन्छु म त !!

तिम्रो कसम!!!!!

टाढा जान्छु भन्छौ बाटो,छेक्ने छैन तिम्रो कसम!!
फेरी तिम्रो मन्को दैलो, टेक्ने छैन तिम्रो कसम!!

बाँचिदिन्छु यो जिन्दगी,अन्जान बनी सधैं भरी,
देखे पनि तिमीलाई, देख्ने छैन तिम्रो कसम !!

भावनामा डुबेर नै, बदलिन सक्छ मन,
तिम्रो मन छुने गीत, लेख्ने छैन तिम्रो कसम!!

रोएको छ मन मेरो,तिम्रो पनि उस्तै होला,
आशुले नै तर पीडा, सेक्ने छैन तिम्रो कसम!!

खुशी चाहे दु:ख पाए, चेति सके अब मैले,
त्यै दल्दलमा फेरी मुटु,फेक्ने छैन तिम्रो कसम !!
फेरी तिम्रो मन्को दैलो, टेक्ने छैन तिम्रो कसम!!

गीत!!!!!

के के कल्पी आँफै आँफै मात्तिएकी फूल तिमी !!
भँवराको हुल देखी आत्तिएकी फूल तिमी !!

बैश चढ्यो मात बढ्यो सुन्दरताले बास पायो !!
चोखो तिम्रो फुल्बारिमा नयाँ मधुमास छायो !!
भरिएको जवानीले मात्तिएकी फुल तिमी !!
पोखिन्छ कि मिठो रस आत्तिएकी फूल तिमी !!

समयको रीत यस्तै ओइली जान्छ फूल पनि !!
बिझाउँछ उदासी त्यो चोट दिने शूल बनी !!
नबुझ्ने झै अझै पनि मात्तिएकी फूल तिमी !!
कता कता चिसो पस्दा आत्तिएकी फूल तिमी !!

तिम्रो साथ याद आयो!!!!!!

ठेश लागि लड्न लाग्दा, तिम्रो साथ याद आयो !!
निदरी नै टाढा भाग्दा , तिम्रो साथ याद आयो !!

दिन रात एकै सरी, याद साँची बिताएका ,
आफु सँगै रात जाग्दा, तिम्रो साथ याद आयो !!

साथ हुँदा सयौ कोश, लाग्थ्यो के नै हो र भनी,
दुई पाइलामै आज थाक्दा, तिम्रो साथ याद आयो !!

चन्चले यो मन पनि, बरालिन्छ त्यसै त्यसै ,
भावनाले सिमा नाघ्दा, तिम्रो साथ याद आयो !!

तिमी बिना यो जिन्दगी ,कसरी खै सोच्नु यहाँ,
औशिले नि जुन माग्दा, तिम्रो साथ याद आयो !!